Nazmi Gripshi po zhvillon sezonin më produktiv të karrierës me skuadrën e Astanës në Kazakistan.
Sulmuesi shqiptar është golashënuesi më i mirë i kampionatit, ndërsa ekipi i tij kryeson renditjen me diferencë nga ndjekësit.
Në ndeshjen e sotme ndaj Okzhtepes, Gripshi shënoi të dy golat e fitores 2-1 në transfertë. Ai realizoi fillimisht në minutën e 6-të nga penalltia dhe përsëriti të njëjtin skenar në minutën e 81-të, sërish nga pika e bardhë.
Me këto gola, Gripshi arriti në kuotën e 15 finalizimeve këtë sezon. Ai lë pas shokun e skuadrës Tomasov, i cili ka 11 gola.
Përveç golave, Gripshi ka dhënë edhe 6 asistime, duke u bërë vendimtar për ekipin. Ky është sezoni i tij më i mirë në aspektin statistikor, por pavarësisht kësaj, trajneri i Shqipërisë, Silvinjo as nuk e merr në konsideratë për një ftesë të mundshme.
