Mesfushori 20-vjeçar, Ermal Meta, ka mbyllur kapitullin e tij trevjeçar me Tiranën për të nisur një aventurë të re në futbollin shqiptar.
Siç zbulon “Ligasport.al”, destinacioni i radhës për lojtarin do të jetë skuadra e Skënderbeut, e cila sapo është rikthyer në elitën e futbollit shqiptar.
Te korçarët, Meta do të gjejë një fytyrë të njohur në stol, trajnerin Julian Ahmataj, me të cilin ka bashkëpunuar te bardheblutë gjatë edicionit 2023/24. Kujtojmë që Ahmataj mori drejtimin e Skënderbeut pas largimit të Ernest Gjokës.
Edhe pse ky sezon nuk ishte më i miri për mesfushorin, i cili u aktivizua në vetëm 13 ndeshje për shkak të dëmtimeve të njëpasnjëshme, 20-vjeçari shihet si një përforcim me mjaft perspektivë për projektin e ri të korçarëve në Superiore.
