Alessandro Bastoni po kalon ditët më të vështira të karrierës sa i përket imazhit të tij në Itali. Pas episodit të javës së kaluar në derbin ndaj Juventusit, ku simulimi i tij çoi në ndëshkimin me karton të kuq të Pierre Kalulu, mbrojtësi i Interit është vënë në shënjestrën e të gjithë tifozërive rivale. Edhe pse ndjesa publike erdhi shpejt, ajo nuk ka mjaftuar për të qetësuar gjakrat.
Në ndeshjen e sotme kundër Lecces, atmosfera ndaj tij ishte armiqësore që nga minuta e parë.
Çdo herë që Bastoni prekte topin, tifozëria vendase shpërthente në vërshëllima. Ky reagim erdhi si pasojë e festës së tij pas largimit të Kalulu javën e kaluar, një gjest që u konsiderua si mungesë respekti dhe “anti-sportiv”.
Kur ndeshja ishte në shifrat 2-0, Bastoni kreu një faull taktik ndaj Banda-s duke e mbajtur hapur nga fanella. Ky veprim i solli kartonin e verdhë, i cili do ta mbajë jashtë sfidës së radhës ndaj Genoas për shkak të plotësimit të numrit të kartonëve.
Ky pezullim duket i mirëmenduar nga mbrojtësi dhe trajneri Cristian Chivu. Duke u pezulluar ndaj Genoas, Bastoni “pastrohet” nga kartonët dhe siguron praninë e tij në derbin e madh ndaj Milanit pas dy javësh.
Fill pas marrjes së kartonit, Chivu e nxori mbrojtësin nga fusha për të shmangur tensionet e mëtejshme ose ndonjë karton të dytë të mundshëm.
