Champions League/ Nuk ka surpriza, shënohen tetë gola në dy ndeshje

Dy ndeshje të raundit të tretë në Champions League, nuk prodhuan surpriza në rezultate.

Galatasaray triumfoi 3-1 në shtëpi ndaj norvegjezëve të Bodo/Glimt. Turqit e nisën vrullshëm duelin, me dy gola të Victor Osimhen, në minutat 3 dhe 33.

Në fraksionin e dytë shënoi edhe Akgun në minutën e 60-të, ndërsa për miqtë, golin e vetëm e realizoi Helmersen në minutën e 76-të.

Kjo është fitorja e dytë radhazi për Galatasarayn, pas asaj me Liverpool dhe shkon në kuotën e gjashtë pikëve.

Me të njëjtin rezultat fitoi edhe Athletic Bilbao, ndaj Qarabag në Spanjë. Iberikët e pësuan që në minutat e para, pas golit të Andrade. Megjithatë, pjesa e parë u mbyll në barazim 1-1, pasi shënoi Guruzeta në minutën e 40-të.

Në fraksionin e dytë, Bilbao shënoi edhe dy herë të tjera me Navarro dhe Guruzeta, për të kompletuar fitoren.