Shkëndija e Tetovës, triumfoi 2-0 ndaj Slovan Bratislava, në ndeshjen e vlefshme për raundin e pestë në Conference League.
Sukses tejet i rëndësishëm për kuqezinjtë, që besojnë te kualifikimi për në fazën tjetër. Skuadra tetovare e nisi më kërkuese ndeshjen dhe gjeti avantazhin në minutën e 33-të.
Bajriç shkaktoi autogol, pas një krosimi nga goditja e këndit. Në fundin e pjesës së parë, rrugën e rrjetës e gjeti edhe Sebastian Spahiu.
Sulmuesi dyfishoi shifrat, pas një kundërsulmi të shpejtë. Këtë avantazh, Shkëndija e ruajti edhe në pjesën e dytë, për të marrë tre pikë të rëndësishme.
Ky sukses, e ngjit Shkëndijën në vendin e 18-të, me 7 pikë të grumbulluara, ndërsa ka mbetur edhe një ndeshje tjetër për të zhvilluar.
Skuadra tjetër shqiptare, Drita u mposht 0-3 nga AZ Alkmaar. Kampionët e Kosovës, u shfaqën të pafuqishëm ndaj holandezëve. Mijnans zhbllokoi takimin në minutën e 17-të, ndërsa në pjesën e dytë shënuan edhe Jensen e Sadiq, për të vulosur fitoren e miqve.
Pavarësisht humbjes, Drita mban vendin e 15-të me 8 pikë të grumbulluara.
