Skuadra e Partizanit është përballur me një lajm negativ sa i përket gjendjes fizike të Tedi Malajt. Mesfushori me tipare sulmuese, sipas “Ligasport.al” ka pësuar një dëmtim serioz në gju gjatë përgatitjeve të ekipit.
Lëndimi i futbollistit 19-vjeçar erdhi në minutën e 80-të të ndeshjes së fundit miqësore. Pas daljes së tij nga fusha, vendin e mori Rouen Human, i cili realizoi edhe golin e dytë për të kuqtë një minutë më pas.
Ky dëmtim krijon probleme për stafin teknik, pasi Malaj shihej si një element i rëndësishëm për edicionin e ri. Lojtari i kombëtares U-19 plotësonte edhe kriterin e FSHF-së për aktivizimin e detyrueshëm të futbollistëve të ditëlindjes 2007 në Superiore.
Futbollisti, i cili festoi ditëlindjen në fillim të këtij muaji, pritet t’i nënshtrohet ekzaminimeve të mëtejshme mjekësore. Tashmë mbetet për t’u parë se sa do të zgjasë periudha e rikuperimit për talentin e kryeqytetasve.
