Mesfushori Masanga Matondo ka zyrtarizuar kalimin e tij te skuadra e Eyupspor-it, duke konfirmuar kështu rikthimin në Superligën turke.
Së fundmi, futbollisti ishte pjesë e Hatayspor-it, ekip që tashmë garon në kategorinë e tretë të futbollit turk. Matondo u largua nga ish-klubi i tij për shkak të problemeve financiare që përfshijnë këtë skuadër.
Pas largimit, ai fitoi gjyqin në FIFA me një dëmshpërblim prej 1.2 milionë eurosh, shifër që mbulonte të gjithë vlerën e kontratës disa-vjeçare. Megjithatë, marrja e kësaj shume mbetet mjaft e vështirë për shkak se Hatayspor-i ndodhet buzë falimentimit dhe përballet me çështje të shumta gjyqësore.
Kujtojmë se tre vite më parë, nga shitja e kartonit të lojtarit në Turqi përfitoi edhe Partizani. Klubi kryeqytetas arriti të arkëtonte 600 mijë euro nga transferimi i mesfushorit te skuadra turke.
Tashmë për Matondon nis një etapë e re në karrierë me fanellën e Eyupspor-it.
