Serbia pësoi një humbje të rëndë 5-0 ndaj Anglisë, e shoqëruar me incidente të shumta në tribuna. Ndeshja u zhvillua me kapacitet të kufizuar të stadiumit për shkak të një dënimi të mëparshëm për sjellje raciste dhe thirrje antishqiptare.
Pavarësisht thirrjeve të federatës për të shmangur incidentet, tifozët serbë shfaqën kore raciste, thirrje kundër Kosovës dhe u përfshinë në përplasje mes tyre. Nuk munguan grushtet në tribunën e serbëve, por jo vetëm. U shënuan edhe tensione me mbështetësit anglezë, ndërsa një tifoz u ndalua nga policia, pasi po shkonte te tribuna e miqve për të marrë simbole të tyre. Gjyqtari ndërpreu përkohësisht ndeshjen për shkak të përdorimit të lazerave ndaj futbollistëve anglezë.
LEXO EDHE: E bujshme/ “Plas” skandali, Serbi-Shqipëri mund të luhet pa tifozë
Të gjitha këto janë pasqyruar nga delegati i UEFA-s, Emil Ubias, dhe pritet të raportohen për shqyrtim. Vendimi përfundimtar i takon FIFA-s, e cila është përgjegjëse për kualifikueset. Në Serbi ekziston frika e një dënimi të rëndë, që mund të çojë në luajtjen e sfidës ndaj Shqipërisë më 11 tetor pa praninë e tifozëve.
