Prapaskenat e merkatos sqarojnë situatën e Kevin Dodajt, i cili nuk është shitur nga CSKA Sofia te Lechia Gdansk siç u raportua fillimisht.
Bëhet fjalë vetëm për një marrëveshje huazimi të sulmuesit 20-vjeçar drejt kampionatit polak. Vllaznia do të përfitonte rreth 100 mijë euro vetëm nëse transferimi do të kryhej për shifrën 650 mijë euro.
Megjithatë, klubi polak po kalon probleme financiare që ndikuan edhe në rënien e tyre në kategorinë e dytë. Për këtë arsye, Lechia Gdansk nuk ishte në gjendje të kryente një investim të tillë.
Nga ana tjetër, vetë Dodaj nuk po gjente hapësira te CSKA Sofia, gjë që lehtësoi mbylljen e kësaj marrëveshjeje në formë huazimi.
Anësori i talentuar mbetet një nga zbulimet më të spikatura në Superiore gjatë edicioneve të fundit. Sulmuesi ka një kontratë me klubin bullgar që mbetet e vlefshme deri në vitin 2028.
