Skuadra e Dinamos po ndjek me interes zhvillimet në arenën ndërkombëtare, ku fati i tyre evropian varet nga finalja e Europa League.
Kampionati gjerman i futbollit u përmbyll zyrtarisht ditën e djeshme, me skuadrën e Freiburg që u rendit në vendin e shtatë të klasifikimit të Bundesligës. Ky pozicionim plotësoi kushtin e parë nga dy të tillë që nevojiten për të dërguar ekipin kryeqytetas direkt në turin e dytë kualifikues të Conference League.
Tashmë vjen hapi i fundit dhe më i vështirë për t’u realizuar nga ky skenar. Ekipit shqiptar i duhet që Freiburg të triumfojë në finalen e madhe të Europa League përballë anglezëve të Aston Villa.
Në rast se skuadra gjermane ia del të fitojë këtë trofe, Dinamo do të kalojë automatikisht në turin e dytë të Conference League për të dytin edicion radhazi.
Ky zhvillim do të shmangte fazën e parë kualifikuese, duke i dhënë më shumë kohë skuadrës për t’u përgatitur për kompeticionin evropian. Për këtë arsye, vëmendja e klubit dinamovit do të jetë tërësisht e përqendruar te kjo finale e madhe.
Kujtojmë se Dinamo është kualifikuar në fazën e “Final Four”, të cilën e ka nisur në mënyrën më të mirë të mundshme.
Kryeqytetasit triumfuan 0-2 ndaj Vllaznisë në ndeshjen e parë dhe synojnë titullin kampion. Megjithatë, për të marrë trofeun, duhet një mrekulli, duke ditur se kanë mbetur vetëm dy ndeshje dhe diferenca është e konsiderueshme.
