Një skenar i pazakontë po qarkullon në futbollin skocez, ku skuadra e Celtic rrezikon ta humbasë në tavolinë ndeshjen vendimtare ndaj Hearts.
Sipas raportimeve, arbitri kryesor nuk arriti të sinjalizonte në asnjë moment mbylljen zyrtare të takimit, i cili po fitohej 3-1 nga vendasit. Situata doli jashtë kontrollit në minutën e fundit, kur pas shënimit të golit të tretë, tifozët vendas pushtuan masivisht fushën e lojës.
Ky vërshim i detyroi lojtarët dhe trupën e gjyqtarëve të largoheshin me shpejtësi drejt dhomave të zhveshjes. Për rrjedhojë, klubi i Hearts ka depozituar një ankesë zyrtare dhe ka dënuar ashpër skenat e dhunshme në “Celtic Park”.
Drejtuesit e ekipit mik bënë me dije se lojtarët dhe stafi i tyre u përballën me abuzime serioze fizike dhe verbale. Për shkak të atmosferës kërcënuese, ata u detyruan të braktisnin stadiumin pa dhënë prononcimet e zakonshme për mediat.
Klubi i Hearts ka nisur një hetim të plotë dhe ka vënë në lëvizje Policinë e Skocisë për këtë ngjarje. Ata kërkojnë që autoritetet e futbollit të marrin masat më të rrepta për të ruajtur integritetin e garës. Në rast se vendoset humbja në tavolinë për Celtic, ky vendim do t’i dorëzonte automatikisht titullin kampion skuadrës së Hearts.
