Klubi i Partizanit ka siguruar një tjetër përfitim të rëndësishëm financiar prej 300 mijë eurosh nga shitja e mesfushori Maguette Gueye. Kjo shumë erdhi pasi skuadra e Racing de Santander siguroi zyrtarisht ngjitjen në La Liga.
Pas kësaj, u aktivizuan automatikisht bonuset e parashikuara në marrëveshjen e transferimit mes palëve. Kartoni i futbollistit senegalez u shit në verën e vitit 2024 për vlerën e 500 mijë eurove.
Gjatë sezonit të tij të parë në Spanjë, të kuqtë arkëtuan edhe 100 mijë euro të tjera pas kualifikimit të Racing në fazën “play-off”. Ndërsa bonusi aktual prej 300 mijë eurosh lidhej me kushtin e rikthimit të klubit në elitë brenda tri viteve.
Mesfushori 23-vjeçar ka luajtur një rol kyç në këtë sukses, duke fituar një vend stabël në formacionin titullar. Aktualisht, skuadra e tij mban vendin e parë në renditjen e La Liga 2.
Me këtë këst të fundit, shuma totale e përfituar nga klubi kryeqytetas për këtë lojtar ka arritur në 900 mijë euro. Kujtojmë që lojtari u zbulua nga skautët e “demave” në vitin 2021, periudhë që i shërbeu edhe si urë kalimi drejt futbollit evropian.
