Skuadra e Dinamos ka arritur të marrë një fitore të rëndësishme në takimin e parë të fazës “Final Four” të kampionatit shqiptar. Kryeqytetasit triumfuan me rezultatin 2-0 përballë Vllaznisë në ndeshjen e zhvilluar mes tyre.
Ky sukses mban ende gjallë shpresat e Dinamos për titullin kampion, ndonëse ky objektiv shihet si i vështirë për t’u arritur. Pjesa e parë e kësaj përballjeje u karakterizua nga një lojë e qetë, ku skuadrat nuk krijuan raste të pastra shënimi. Si rrjedhojë, fraksioni i parë i lojës u mbyll me rrjeta të paprekura.
Në pjesën e dytë, shkodranët u shfaqën më kërkues në fushë, por ekuilibrat e ndeshjes ndryshuan tërësisht në minutën e 69-të. Mbrojtësi i Vllaznisë, Melos Bajrami, u ndëshkua me kartonin e dytë të verdhë dhe la ekipin e tij me dhjetë lojtarë.
Dinamo përfitoi mjaft mirë nga ky superioritet numerik dhe zhbllokoi rezultatin në minutën e 77-të. Sulmuesi Malomo shfrytëzoi saktë një pasim të marrë brenda zonës duke mposhtur portierin Qarri.
Pavarësisht përpjekjeve të mëvonshme, kuqeblutë nuk arritën dot të reagonin për të barazuar shifrat.
Në fund, kryeqytetasit gjetën edhe golin e dytë me James, pas një kundërsulmi. Pas këtij takimi, Dinamo mban vendin e katërt në kuotën e 27 pikëve, ndërsa Vllaznia qëndron e dyta me 31 pikë.
