Komisioni i Disiplinës dhe Etikës pranë FSHF-së ka zbardhur vendimet e fundit lidhur me incidentet e regjistruara në kampionatin shqiptar.
Masat më të rënda i ka pësuar presidenti i Vllaznisë, Alban Xhaferi, i cili u dënua me 15 ndeshje pezullim për grushtin ndaj arbitrit. Gjatë kësaj periudhe, numrit një të klubit shkodran i është ndaluar gjithashtu hyrja në të gjitha stadiumet e vendit.
Ndëshkim të ashpër mori edhe trajneri Edi Martini, i cili është pezulluar me 6 ndeshje për shkelje të rregullave të sjelljes ndaj arbitrave.
Penalizimet te Shkodranët vijuan me trajnerin e portierëve Elis Dervishaj, të dënuar me 4 ndeshje pezullim. Nga ana tjetër, Elbasani u gjobit me 100 mijë lekë për mospërmbushje të përgjegjësive të sigurisë gjatë ndeshjes.
Ndërkohë, tekniku i Dinamo City-t, Ilir Daja, është dënuar me 2 ndeshje pezullim për protesta ndaj vendimeve të arbitrimit.
Komisioni pranoi vetëm kërkesën e lojtarit të Partizanit, Human Lancaster Rowan, për konvertimin e pjesës së mbetur të dënimit.
VENDIMET:
1. AF Elbasani, për mospërmbushje të përgjegjësive lidhur me rendin dhe sigurinë, për incidentet e
ndodhura pas përfundimit të ndeshjes, si brenda ashtu edhe në afërsi të stadiumit, në bazë të
neneve 8/1 dhe 17/1 të KDE, dënohet me gjobë në masën 100.000 (njëqind mijë) lekë.
2. Zyrtari i KF Vllaznia, Alban Xhaferi, për sulm ndaj zyrtarëve të ndeshjes, në bazë të nenit 14/1/l të
KDE, dënohet me 15 (pesëmbëdhjetë) ndeshje pezullim nga veprimtaritë.
Në zbatim të nenit 6/2/c të KDE, zyrtarit i ndalohet hyrja në të gjitha stadiumet gjatë zhvillimit të
veprimtarive sportive të organizuara nga FSHF, deri në përfundimin e dënimit.
3. Zyrtari i KF Vllaznia, Edi Martini, për shkelje të rregullave themelore të sjelljes së mirë dhe sjellje
josportive ndaj zyrtarëve të ndeshjes, në bazë të neneve 13/2 dhe 14/1/j të KDE dënohet me 6
(gjashtë) ndeshje pezullim nga veprimtaritë.
4. Zyrtari i KF Vllaznia, Elis Dervishaj, për sjellje josportive ndaj zyrtarëve të ndeshjes, në bazë të nenit
14/1/j të KDE dënohet me 4 (katër) ndeshje pezullim nga veprimtaritë.
5. Zyrtari i FC Dinamo City, Ilir Daja, për protestë ndaj vendimeve të zyrtarëve të ndeshjes, në bazë të
nenit 14/1/c të KDE, dënohet me 2 (dy) ndeshje pezullim nga veprimtaritë.
6. Pranimin e kërkesës së lojtarit të FK Partizani, Human Lancaster Rowan, për konvertimin e pjesës së
mbetur të dënimit, bazuar në nenin 75 të Kodit të Disiplinës dhe Etikës.
7. Rrëzimin e kërkesës së Klubit të Futbollit Delvina, në lidhje me faljen e dënimit për zhvillimin e
ndeshjeve pa spektatorë, si të pabazuar në Kodin e Disiplinës dhe Etikës.
8. Rrëzimin e kërkesës së lojtarit të KF Iliria, Brajan Selmani, si të pabazuar në Kodin e Disiplinës dhe
Etikës.
9. Rrëzimin e kërkesës së lojtarit të KF Oriku, Bruno Telushi, si të pabazuar në Kodin e Disiplinës dhe
Etikës.
Kundër vendimit lejohet ankim brenda 3 (tre) ditëve përpara Komisionit të Apelit.
