Klubi i Tiranës ka nisur planifikimin për sezonin e ardhshëm, duke vendosur si prioritet absolut zgjidhjen e çështjes së pankinës.
Vëmendja e drejtuesve bardheblu është përqendruar tërësisht te trajneri Orges Shehi, i cili arriti të stabilizonte skuadrën pas rikthimit të tij në pjesën e dytë të kampionatit.
Tekniku durrsak ende nuk ka marrë një vendim përfundimtar për të ardhmen, teksa interesi për shërbimet e tij mbetet i lartë.
Përveç disa opsioneve brenda Kategorisë Superiore, Shehi ka marrë oferta konkrete edhe nga klube në kampionatin e Kosovës, çka e ndërlikon procesin e bisedimeve për drejtuesit e Tiranës.
Pavarësisht këtyre alternativave, prioriteti i klubit kryeqytetas është gjetja e një akordi për të vazhduar bashkëpunimin dhe projektin teknik edhe për vitin e ardhshëm. Kjo javë konsiderohet si vendimtare për të ndarë të ardhmen e stolit bardheblu.
Vendimi i marrë nga Shehi do të shërbejë si pikënisje për të gjitha lëvizjet e tjera dhe strategjinë që do të ndiqet në merkaton e verës.
