E ardhmja e trajnerit Silvinjo në Kombëtaren shqiptare, pritet të vendoset brenda muajit maj. Tekniku brazilian është futur në muajt e fundit të kontratës, e cila i skadon në korrik. Federata Shqiptare, nuk ka vendosur ende, pasi po pret përgjigjen e Silvinjos, i cili duhet të vendosë nëse do qëndrojë me kushte të reja, apo do të largohet.
Braziliani ka zbarkuar së fundmi në Tiranë, ku do të ketë takim me presidentin Armand Duka, për të vendosur përfundimisht mbi të ardhmen. Së fundmi “Telesport” raporton se FSHF i ka ofruar rinovimin Silvinjo, por jo me rrogën e mëparshme. Thuhet se paga që i është propozuar teknikut kap shifrën e 800 mijë eurove në sezon.
Mbetet të shihet nëse do të vendosë të qëndrojë, apo do të largohet për një aventurë të re. Silvinjo mori drejtimin e Shqipërisë në janar të vitit 2023 dhe nën drejtimin e tij, ekipi shkëlqeu, duke u kualifikuar në Europian si i pari i grupit. Në Euro 2024, Kombëtarja mori vetëm një pikë, pas barazimit me Kroacinë dhe humbjeve me Italinë dhe Spanjën.
Pas kësaj, te Shqipëria filloi rënia, ku Liga e Kombeve, solli zbritjen nga Liga B në atë C. Rrugëtimi në kualifikueset e Botërorit ishte pozitiv, duke u renditur në vendin e dytë, pas Anglisë. Megjithatë, Shqipëria nuk ia doli të kualifikohej, pasi u mposht në “play off” nga Polonia. Këto ditë të fundit të muajit maj, pritet të përcaktojnë fatin e Silvinjos dhe të stolit të Kombëtares shqiptare.
