E ardhmja e Gianni Infantinos në krye të FIFA-s është vënë në diskutim pas polemikave që shoqëruan projektin për krijimin e një entiteti të ri komercial të lidhur me Kupën e Botës dhe kompeticionet e tjera të FIFA-s.
Projekti, i paraqitur si një mënyrë për të rritur të ardhurat për zhvillimin e futbollit, u kundërshtua nga UEFA, CONCACAF dhe konfederata të tjera për shkak të shqetësimeve mbi transparencën dhe qeverisjen.
Pas reagimeve, FIFA vendosi ta tërhiqte nismën. Ndërkohë kanë nisur të përmenden emrat e mundshëm që mund të kandidojnë për postin e presidentit në zgjedhjet e ardhshme.
Mes tyre janë Arsene Wenger, Nasser Al-Khelaifi, Salman bin Ibrahim Al Khalifa, Victor Montagliani dhe Aleksander Ceferin. Sipas vlerësimeve, Ceferin konsiderohet kandidati me profilin më të fortë për këtë detyrë.
Në rast se Ceferin merr drejtimin e FIFA-s, do të linte bosh postin e presidentit në UEFA. Në këtë situatë, drejtimi i UEFA-s mund të merret nga Armand Duka. Shqiptari mban postin e zv.presidentit në UEFA dhe në rast largimi të Ceferin, mund të drejtojë institucionin përkohësisht, deri në zgjedhjen e një presidenti të ri.
Megjithatë, kjo duket e vështirë të ndodhë, pasi përveç Dukës në UEFA janë edhe disa zv.presidentë të tjerë.
