Bujar Pllana është zyrtarisht pjesë e Kombëtares shqiptare pas autorizimit të marrë nga FIFA për ndryshimin e përfaqësueses.
Mbrojtësi 24-vjeçar, i cili më parë ka qenë pjesë e ekipit U-21 të Kosovës, ka marrë lejen e nevojshme pasi nuk kishte zhvilluar asnjë ndeshje zyrtare me ekipin e parë të “Dardanëve”.
Trajneri Silvinjo i ka dërguar ftesën mbrojtësit që luan si në qendër, ashtu edhe në krahun e djathtë, duke e përfshirë në planet për sfidat e radhës, ndërsa kjo është zbuluar nga FIFA.
Pllana vjen pas një aktivizimi të rregullt në elitën e futbollit polak këtë sezon, ku ka regjistruar 11 ndeshje dhe 794 minuta lojë. Krahas tij, te kuqezinjtë pritet edhe afrimi i mbrojtësit të majtë të AEK-ut të Athinës, Stavros Pilios.
Këto lëvizje vijnë në kuadër të përgatitjeve për ndeshjen teke të “Play-Off”-it të Kupës së Botës 206, që do të luhet më 26 mars në Varshavë kundër Polonisë. Fituesi i këtij takimi do të kalojë në finalen që përcakton pjesëmarrjen në Botërorin që zhvillohet këtë verë në SHBA, Meksikë dhe Kanada.
Lista e plotë e futbollistëve të grumbulluar pritet të publikohet nga Silvinjo gjatë javës së ardhshme.
