Presidenti i Skënderbeut, Ardian Takaj, ka konfirmuar ambiciet për rikthimin e “Skënderbeut të madh” në sezonin e ri.
Në një bisedë me gazetarin Ervin Baku, kreu i klubit korçar ka garantuar ndërtimin e një skuadre tejet kompetitive, duke rritur pritshmëritë e sportdashësve juglindorë. Projekti synon të kthejë Skënderbeun në majat e futbollit shqiptar, pas sigurimit të ngjitjes në Superiore.
Takaj është shprehur i vendosur për të investuar në një ekip që do të jetë pretendent që në start, duke paralajmëruar lëvizje të rëndësishme në merkato.
“Kam zhvilluar një bisedë të gjatë telefonike me presidentin Ardian Takaj. Kemi folur për shumë çështje që lidhen me të ardhmen e klubit dhe sidomos për Skënderbeun që të gjithë duan të shohin në sezonin e ri. Nga ajo që kam mësuar, presidenti ka garantuar se do të ndërtojë një ekip shumë kompetitiv”, është shprehur gazetari.
Kujtojmë, se duke filluar nga vera e ardhshme, Skënderbeu mund të luajë në Europë, pasi i përfundon dënimi 10-vjeçar i dhënë nga UEFA.
