E konfirmon FSHF, Tirana largohet nga “Selman Stërmasi”. Zbulohet ku do të luajë

Axhenda e Kategorisë Superiore ka pësuar ndryshim për këtë javë, pasi ndeshja mes Tiranës dhe Teutës nuk do të zhvillohet në stadiumin “Selman Stërmasi”.

Klubi bardheblu ka vendosur që takimi të luhet në “Air Albania”, vendim që është konfirmuar nga Federata Shqiptare e Futbollit. Përballja është pjesë e javës së shtatë të kampionatit.

Tirana vjen pas fitores në derbi ndaj Partizanit dhe synon të vazhdojë serinë e rezultateve pozitive. Nga ana tjetër, Teuta renditet në vendin e katërt të tabelës.

“Djemtë e detit” kanë pesë pikë më shumë se kryeqytetasit dhe kërkojnë të ruajnë diferencën. Ndeshja pritet të ketë interes të lartë për shkak të formës së mirë të të dy skuadrave.