Ernest Muçi është kthyer në sensacionin e Superligës turke këtë sezon, duke shkëlqyer me fanellën e Trabzonspor.
Sipas raportimeve të fundit nga mediat turke, konkretisht “Haber TS”, bordi i klubit ka marrë vendimin përfundimtar: blerjen e plotë të kartonit të 24-vjeçarit gjatë merkatos së verës.
Ndonëse Muçi po luan si i huazuar nën urdhrat e trajnerit Fatih Tekke, kartoni i tij zotërohet nga Besiktas, por Trabzonspor ka hartuar një plan financiar për ta mbajtur sulmuesin shqiptar në ekip përmes një pagese me këste.
Statistikat e Muçit këtë sezon janë mbresëlënëse dhe dëshmojnë formën më të mirë në karrierën e tij, me 13 gola dhe 5 asiste.
Ky rendiment i lartë ka tërhequr vëmendjen e klubeve nga Premier League angleze, por dëshira e Trabzonspor është ta bllokojë lojtarin sa më parë për të siguruar shërbimet e tij edhe për sezonin e ardhshëm.
Me këtë lëvizje, ish-sulmuesi i Tiranës pritet të konfirmohet si pika kyçe e projektit të ri të skuadrës nga Trabzoni.
