Thomas Strakosha është rikthyer në vëmendjen e merkatos pas performancave të tij mbresëlënëse në kampionatin grek me AEK-un e Athinës.
Portieri 30-vjeçar i Kombëtares shqiptare, i cili po kalon një nga momentet më të mira të karrierës, ka rënë në “shënjestrën” e legjendës angleze Frank Lampard. Trajneri aktual i Coventry City-t thuhet se po monitoron me vëmendje gardianin kuqezi, sidomos pas pritjes spektakolare të penalltisë në derbin ndaj PAOK-ut, një moment që ka bërë xhiron e mediave helene.
Ndonëse Strakosha ka një kontratë afatgjatë me AEK-un deri në vitin 2029, Coventry City po planifikon një ofertë serioze për të bindur klubin athinas.
Skuadra angleze aktualisht udhëheq Championship-in me 62 pikë pas 32 javësh dhe është rrugës drejt ngjitjes në Premier League. Financat e fuqishme të klubit dhe dëshira e Lampard për një portier me përvojë ndërkombëtare mund ta rikthejnë Strakoshën në ishull.
Për portierin shqiptar, ky nuk do të ishte një ambient i panjohur, duke qenë se më herët ka qenë pjesë e Brentford-it në elitën e futbollit anglez.
