Mesfushori brazilian Rafael Freitas ka mbyllur bashkëpunimin me Tiranën dhe do të vijojë karrierën në Maqedoninë e Veriut.
Lojtari ka firmosur me Shkëndijën e Tetovës, duke nisur një aventurë të re në kampionatin maqedonas.
Sipas raportimeve, marrëveshja mes palëve është firmosur me një kontratë 1+1. Freitas largohet nga Tirana pas një periudhe ku ishte pjesë e rëndësishme e repartit të mesfushës.
Braziliani u aktivizua rregullisht me bardheblutë dhe dha kontributin e tij gjatë sezonit. Në edicionin e fundit, ai zhvilloi 25 ndeshje zyrtare dhe realizoi katër gola.
Paraqitjet e tij tërhoqën vëmendjen e Shkëndijës, e cila vendosi ta afrojë në skuadër. Tashmë, Freitas do të kërkojë të japë kontributin e tij me fanellën e klubit tetovar në sezonin e ri.
