Klubi i Partizanit ka nisur përgatitjet intensive për sezonin e ri futbollistik, duke projektuar ndryshime të mëdha si në infrastrukturë, ashtu edhe në stafin teknik.
Falë investimeve të presidentit Gaz Demi, kompleksi i të kuqve po shndërrohet në një qendër moderne, e cila këtë vit do të ofrojë një stadium të ri me tapet natyral dhe tri fusha stërvitore të standardeve më të larta të UEFA-s.
Paralelisht me investimet në infrastrukturë, drejtuesit kanë gjetur edhe trajnerin e ri, i cili do të jetë tekniku rumun Florin Bratu. Sipas “Tema”, 46-vjeçari, i pajisur me licencën “UEFA Pro”, ka arritur marrëveshjen totale me klubin kryeqytetas dhe pritet të zyrtarizohet së shpejti.
Bratu vjen me një CV të pasur, pasi si futbollist ka luajtur për klube si Galatasaray, Nantes e Dinamo Bukuresht (si dhe me Kombëtaren e Rumanisë), ndërsa si trajner ka punuar përkrah emrave si Mircea Lucescu e Fatih Terim, eksperiencë të cilën do ta vendosë në shërbim të Partizanit për të ndërtuar një projekt fitues.
