Klubi i Egnatias ka arritur marrëveshjen për të siguruar shërbimet e mbrojtësit të majtë brazilian Andrey Yago.
28-vjeçari vjen te rrogozhinasit menjëherë pas largimit nga radhët e Vllaznisë, ku ishte një titullar i padiskutueshëm në repartin e prapavijës.
Pavarësisht rëndësisë së tij në fushë, fundi i kampionatit te shkodranët u shoqërua me tensione të shumta, ku një përplasje me trajnerin Edi Martini bëri që palët të ndërprisnin bashkëpunimin.
Egnatia ka lëvizur shpejt në merkato për të përfituar nga kjo situatë dhe ka mbyllur me sukses bisedimet. Mbrojtësi brazilian pritet t’i bashkohet skuadrës së tij të re javën e ardhshme në Bullgari, ku kampionët në fuqi po zhvillojnë fazën e tyre përgatitore për ndeshjet europiane.
