Ndeshja e 15 nëntorit në transfertë ndaj Sllovenisë, mund t’i sigurojë Kosovës vendin në fazën “play off” të Botërorit.
“Dardanëve” do t’u mjaftonte edhe një barazim për të arritur objektivin. Situata para sfidës ka sjellë edhe një rast të pazakontë për Federatën Sllovene të Futbollit, e cila është detyruar të pezullojë përkohësisht shitjen e biletave. Shkak janë bërë kërkesat e shumta nga tifozët e Kosovës për të ndjekur ndeshjen nga shkallët e stadiumit.
“Për blerjen e biletave në sektorin e mysafirëve, ju lutemi kontaktoni federatën e futbollit të ekipit mysafir. Gjatë blerjes së biletave në sektorin për tifozët sllovenë, duhet të respektohen rreptësisht të gjitha rregullat dhe udhëzimet e përcaktuara nga organizatori. Hyrja në stadium(përveç sektorit të mysafirëve) NUK do të lejohet me simbole të përfaqësueses së Kosovës”, njoftohet për blerjen e biletave.
Kështu të gjitha tashmë menaxhohen nga Federata e Futbollit të Kosovës. Megjithatë tashmë tifozët e Kosovës duken se kanë siguruar bileta në numër të konsiderueshëm, përderisa u pezullua shitja e tyre.
