Edon Zhegrova nuk është grumbulluar nga Juventusi për ndeshjen ndaj Comos dhe pjesëmarrja e tij në sfidën e Ligës së Kampionëve kundër Real Madridit është në dyshim.
Futbollisti i Kosovës vuan nga një shqetësim në ijë dhe në zonën e pubisit, problem që e ka ndjekur që nga sezoni i kaluar. Trajneri Franco Foda e kishte menaxhuar me kujdes gjatë grumbullimit me përfaqësuesen e Kosovës, por pas rikthimit në Torino, gjendja e tij nuk është përmirësuar. Igor Tudor konfirmoi mungesën e tij, duke theksuar nevojën për trajtim të kujdesshëm.
Zhegrova ka zhvilluar vetëm tre paraqitje dhe gjithsej 36 minuta me Juventusin, pasi dëmtimi e ka penguar të marrë ritmin e duhur.
Klubi po ndjek një plan specifik për rikuperimin e tij, në mënyrë që të shmangen rikthimet e problemeve. Stafi mjekësor do ta monitorojë ditë pas dite, për të përcaktuar nëse mund të rikthehet për ndeshjet e ardhshme.
