Gara për shërbimet e talentit Deivid Hoxha është mbyllur me suksesin e klubit të Egnatias.
Skënderbeu kishte punuar gjatë për të arritur një marrëveshje me Panetolikos, por në fund ishin kampionët në fuqi ata që siguruan firmën e sulmuesit 19-vjeçar.
Lëvizja vjen si pasojë e rregullit të ri të FSHF-së, i cili detyron klubet të aktivizojnë të paktën një futbollist të lindur në vitin 2007 ose më vonë. Hoxha konsiderohet një element me mjaft perspektivë, pasi edicionin e kaluar arriti të debutonte në Superligën greke me Panetolikos.
Përveç kësaj, ai zhvilloi paraqitje mjaft cilësore në kampionatin U19 të shtetit fqinj.
Sipas raportimeve, Egnatia arriti të parakalonte Skënderbeun duke plotësuar kërkesat financiare të klubit helen dhe përfaqësuesve të lojtarit.
