Futbollistët e ekipit ukrainas, Oleksandryia refuzuan t’u shtrëngonin duart lojtarëve të Partizanit nga Beogradi para fillimit të raundit të dytë kualifikues të Ligës së Konferencës. Ukrainasit ishin të mbështjellë me flamujt e vendit të tyre, ndërsa lojtarët e Partizanit kaluan pranë tyre dhe nuk u dhanë dorën.
Një veprim i tillë mund të pritej pas gjithçkaje që ndodhi para se ndeshja të luhej në Katowice të Polonisë. Konkretisht, trajneri i Oleksandrias, Kiril Nesterenko, kritikoi Partizanin në konferencën për shtyp para ndeshjes për pjesëmarrjen në turneun në Rusi.
“Dua të shpjegoj situatën në vendin tonë dhe duam të falënderojmë ushtarët tanë për mundësinë që na dhanë të jemi këtu sot dhe të përfaqësojmë vendin tonë. Dua të them se të gjithë duhet ta dinë se çfarë po ndodh në vendin tonë, njerëz po vdesin çdo ditë dhe Rusia është agresorja. Ne nuk e mbështesim klubin e futbollit Partizan në asnjë mënyrë duke pasur parasysh faktin se ata morën pjesë në turneun në Rusi. Klubi e konsideron këtë një akt armiqësie ndaj klubit tonë. Ky është qëndrimi i klubit dhe i popullit të Ukrainës”, tha ai.
Kujtojmë se për ekipin ukrainas luan edhe shqiptari, Tedi Cara.
