Sulmuesi i kombëtares shqiptare, Ernest Muçi, mungoi në fitoren 2-1 të Trabzonsporit ndaj Galatasaray-t për shkak të një problemi fizik.
Trajneri i skuadrës turke, Fatih Tekke, sqaroi përpara fillimit të ndeshjes se Muçi ka pësuar një spazmë të rëndë në kurriz vetëm dy ditë përpara takimit, duke u detyruar ta ndiqte sfidën nga tribuna.
Ndonëse lojtari ishte rikthyer në stërvitje pas angazhimit me Shqipërinë, shqetësimet e fundit kanë vënë në dyshim aktivizimin e tij të menjëhershëm.
Pas përfundimit të ndeshjes, tekniku Tekke u shpreh skeptik edhe për rikthimin e shpejtë të sulmuesit në javën e ardhshme. “Do të jetë shumë e vështirë që Muçi të kthehet për ndeshjen radhës,” deklaroi ai, duke e rreshtuar shqiptarin krah mungesave të tjera si Batagov dhe Oulai.
Ky dëmtim vjen në një moment vendimtar të kampionatit, teksa Trabzonspori vazhdon të jetë një nga pretendentët kryesorë në garën për titullin kampion në Turqi.
