UEFA ka zyrtarizuar emrin e arbitrit që do të vendosë drejtësinë në finalen e këtij edicioni të Champions League mes Arsenalit dhe PSG-së. Përgjegjësia i është besuar gjermanit Daniel Siebert, një emër që ka sjellë surprizë në opinionin sportiv.
Gjyqtari 42-vjeçar do të drejtojë finalen e tij të parë në nivelet elitare të kompeticioneve të UEFA-s apo FIFA-s. Përzgjedhja e tij konsiderohet e papritur, duke qenë se ai nuk ka pasur përvojë të mëparshme në finale të këtij rëndësie.
Megjithatë, Siebert nuk është një figurë e panjohur për skuadrën e Arsenalit. Ai ishte arbitri kryesor në gjysmëfinalen ku londinezët eliminuan Atletico Madridin, një kujtim pozitiv për ekipin e Mikel Artetas. Po ashtu, gjermani e drejtoi Arsenalin edhe në ccerekfinale ndaj Sporting. Në qarqet e arbitrimit, gjermani njihet si një gjyqtar mjaft strikt gjatë menaxhimit të lojës.
Statistikat e tij tregojnë një mesatare të lartë ndëshkimesh, me rreth pesë kartonë të verdhë për çdo ndeshje. Finalja e madhe është programuar të luhet më datë 30 maj në Budapest të Hungarisë. Stadiumi “Puskas Arena” do të jetë skena ku Siebert do të drejtojë këtë përballje historike.
Përgatitjet për këtë ngjarje kanë hyrë në fazën finale, ndërsa vëmendja do të jetë edhe te vendimet e gjyqtarit gjerman. Të dyja skuadrat presin një gjykim korrekt në kërkim të trofeut më të rëndësishëm për klube.
