Egnatia ka hedhur një hap të rëndësishëm drejt titullit kampion. Rrogozhinasit triumfuan 2-1 ndaj Vllaznisë, në stadiumin “Air Albania”, në sfidën e dytë të “Final Four”.
Në një përballje tejet të luftuar, kampionët në fuqi treguan forcën e tyre. Pas disa tentativave të pasakta, në minutën e 38-të, erdhi dhe zhbllokimi i takimit.
Sota shfrytëzoi një krosim të Kryeziut dhe i dha avantazhin Egnatias, me një gol me kokë. Pjesa e parë u mbyll me këtë rezultat, ndërsa e dyta ishte më e luftuar.
Bakayoko kishte mundësinë e artë në minutën e 73-të, për të dyfishuar shifrat, por me portën e boshatisur, nuk ia doli dot, pasi u ndal nga Pohls në momentin e fundit.
Vetëm 4 minuta më vonë, u shënua goli i barazimit. Murataj u ndal nga shtylla, ndërsa Qato përfitoi nga topi i kthyer dhe e dërgoi në rrjetë.
Megjithatë, ky barazim i Vllaznisë zgjati pak. Në minutën e 88-të, Egnatia gjeti avantazhin, me golin e shënuar nga Adjesa me kokë.
Pas këtij goli, në fushë shpërtheu sherri mes palëve, ndërsa u ndëshkua me të kuq Aleksi i cili la Egnatian me 10 lojtarë.
Rrogozhinasit ia dolën ta ruajnë këtë avantazh deri në fund, për të marrë kryesimin në “Final Four”. Me këtë sukses, Egnatia ngjitet e para me 34 pikë, 3 më shumë se Vllaznia dhe Elbasani.
RENDITJA:
Egnatia 34 pikë
Elbasani 31 pikë
Vllaznia 31 pikë
Dinamo 27 pikë
