Simone Inzaghi ishte një nga emrat më të përfolur për të marrë drejtimin e Napolit pas largimit të Antonio Contes, por trajneri italian ka vendosur të mos rikthehet në Serie A, të paktën për momentin. Mediat italiane raportojnë se drejtuesit e klubit napolitan kontaktuan teknikun e Al Hilal për të kuptuar nëse ekzistonte mundësia e një rikthimi të shpejtë në futbollin italian.
Pas përfundimit të sezonit në Arabinë Saudite, ku Al Hilal humbi titullin kampion në momentet e fundit, por arriti të fitojë kupën, Inzaghi u konsiderua si një nga alternativat kryesore për pankinën e Napolit. Megjithatë, trajneri vendosi të refuzojë ofertën, edhe pse sipas raportimeve ai e vlerësoi interesimin e klubit italian.
Një nga arsyet kryesore që pengon rikthimin e tij në Europë lidhet me kontratën që ai ka aktualisht në Arabinë Saudite. Sipas rregullave, Inzaghi nuk mund të marrë drejtimin e një skuadre tjetër përpara korrikut të vitit 2027, nëse nuk pranon të paguajë një shumë të konsiderueshme si penalitet fiskal.
Bëhet fjalë për rreth 6 milionë euro që trajneri do të duhej t’i kthente autoriteteve në rast të ndërprerjes së parakohshme të eksperiencës së tij në Arabinë Saudite. Një situatë e ngjashme kishte ndodhur më herët edhe me Stefano Piolin, i cili pas eksperiencës te Al Nassr u detyrua të priste disa javë përpara se të zyrtarizonte rikthimin në Serie A me Fiorentinën.
Për këtë arsye, Inzaghi ka vendosur të vazhdojë projektin me Al Hilal, pavarësisht se sezoni i fundit u shoqërua me kritika nga tifozët në rrjetet sociale. Megjithatë, sipas mediave saudite dhe italiane, drejtuesit e klubit nuk po mendojnë për një ndryshim në pankinë dhe tekniku italian vazhdon të ketë mbështetjen e klubit.
Aktualisht, ish-trajneri i Interit jeton me familjen e tij në Riad dhe po përgatitet për sezonin e ri. Edhe pse humbi titullin kampion në javët e fundit të sezonit, ai mbetet një nga trajnerët më të vlerësuar në kampionatin arab.
Ndërkohë, Napoli vazhdon kërkimet për trajnerin e ri që do të nisë ciklin pas Antonio Contes. Drejtuesit e klubit po shqyrtojnë alternativa të tjera në treg.
