Hansi Flick do të vazhdojë të drejtojë Barcelonën përtej sezonit të ardhshëm. Trajneri gjerman ka firmosur zyrtarisht rinovimin e kontratës së tij me klubin katalanas deri në vitin 2028, me mundësi rinovimi edhe për një tjetër sezon.
Firma u hodh në zyrat e klubit në prani të presidentit Joan Laporta dhe drejtuesve të tjerë të Barcelonës. Edhe pse skuadra ka ende për të zhvilluar ndeshjen e fundit të kampionatit ndaj Valencias, drejtuesit kanë nisur prej kohësh planifikimin për sezonin e ardhshëm dhe rinovimi i Flick konsiderohej një nga prioritetet kryesore të klubit.
Bisedimet mes palëve kishin nisur më herët, por trajneri gjerman kishte preferuar të priste përfundimin e sezonit përpara se të firmoste kontratën e re. Pas sigurimit të titullit të dytë radhazi në La Liga, palët finalizuan marrëveshjen që do ta mbajë Flick në stolin katalanas edhe për të paktën tre vite të tjera.
Gjatë negociatave, Barcelona arriti të përfshijë edhe një klauzolë opsionale për sezonin pasardhës 2028-2029. Fillimisht, Flick nuk ishte plotësisht dakord me këtë formulë, pasi ka shprehur disa herë bindjen se kontratat shumë afatgjata nuk janë gjithmonë të favorshme për trajnerët. Megjithatë, pas diskutimeve të fundit, u arrit kompromisi përfundimtar dhe marrëveshja u mbyll pa probleme.
Në dy sezonet e tij te Barcelona, Flick ka regjistruar rezultate pozitive si në kampionat ashtu edhe në kompeticionet e tjera. Nën drejtimin e tij, skuadra ka fituar pesë trofe, mes tyre dy tituj kampionë në La Liga, dy Superkupa të Spanjës dhe një Kupë të Mbretit.
Në total, Flick ka drejtuar Barcelonën në 116 ndeshje zyrtare. Bilanci përfshin 88 fitore, 10 barazime dhe 18 humbje. Skuadra ka realizuar 317 gola dhe ka pësuar 132, statistika që tregojnë efikasitetin ofensiv të ekipit gjatë kësaj periudhe.
