Komisioni i Disiplinës dhe Etikës pranë FSHF-së ka goditur me dorë të rëndë në mbledhjen e fundit, ku spikat përjashtimi i Shkumbinit nga gara dhe dënimi i ashpër për Bruno Telushin. Megjithatë, ka pasur edhe “dritë jeshile” për disa emra të njohur që ishin nën pezullim.
Për shkak të tërheqjes nga loja në ndeshjen ndaj Këlcyrës, Shkumbini e humb sfidën 3-0 në tavolinë, gjobiten me 500 mijë lekë dhe përjashtohen zyrtarisht nga Kategoria e Dytë, duke zbritur automatikisht në Kategorinë e Tretë. Dy zyrtarë të klubit, Florent Hasbajrami dhe Musa Xhaja, janë pezulluar me nga 3 muaj.
Nga ana tjetër, lojtari i Oriku, Bruno Telushi, është pezulluar me 8 ndeshje për sjellje të dhunshme dhe sulm ndaj kundërshtarëve, çka do të thotë se sezoni për ish-kapitenin e Partizanit përfundon këtu.
Lajm i mirë për Flamurtarin dhe Luftëtarin. Mbrojtësi i vlonjatëve, Luciano Skuadrone, i cili ishte dënuar me 6 muaj pezullim për incidentet në Elbasan, është falur nga Disiplina. Atij i është pezulluar ekzekutimi i dënimit dhe është vendosur në një periudhë prove prej 6 muajsh. Po ashtu, është pranuar kërkesa e Behar Ramadanit për pezullimin e pjesës së mbetur të dënimit.
