Pas zyrtarizimit të largimit të Edlir Tetovës në mbyllje të këtij edicioni, te kampionët e Egnatias ka nisur menjëherë “gjuetia” për pasuesin e tij.
Presidenti Agim Demrozi po shqyrton disa opsione, ku në listë thuhet se janë të paktën pesë emra të njohur, duke synuar një emër që do të vijojë projektin ambicioz të rrogozhinasve.
Në tryezën e diskutimeve janë trajnerë që e njohin mirë ambientin e Superiores, si Skënder Gega dhe Ditmar Bicaj, por po kërkohet edhe risi me figura të rëndësishme të futbollit tonë.
Ledian Memushaj është një tjetër kandidat serioz, i cili shihet si një mundësi për të sjellë frymë të re, së bashku me dy ish-lojtarë të tjerë të famshëm të Kombëtares që po kthejnë vëmendjen nga karriera e trajnerit.
Vendimi final pritet të merret pas përfundimit të fazës “Final 4”, për t’i lënë qetësinë e duhur skuadrës në luftën për titullin kampion.
