Pogradeci triumfoi 2-1 me përmbysje ndaj Skënderbeut në derbin e juglindjes, në duelin e javës së 15-të në Kategorinë e Parë.
Në Korçë, ishte një ndeshje me dy tablo. Pjesa e parë foli për vendasit, që ishin më kërkues dhe iu afruan golit në disa raste.
Ndeshjen e zhbllokoi i përhershmi Nasër. Egjiptiani shfrytëzoi një krosim nga e djathtë i Vangjelit dhe me një lëvizje të bukur në zonë, e dërgoi topin në rrjetë, duke i dhënë avantazhin Skënderbeut.
Fraksioni i dytë nisi me Pogradecin më kërkues. Në minutën e 48-të, Kazeem vendosi baraspeshën, pasi përfitoi nga një top i larguar gabim në zonë nga Dwmfour.
SHIKONI RENDITJEN: https://vetemsport.com/kategoria-e-pare-renditja-pas-javes-12/
Në minutat shtesë, Danladi bëri heroin për liqenorët duke shënuar një supergol, për të përmbysur rezultatin dhe për t’i dhënë fitoren ekipit të tij.
Me këtë sukses, Pogradeci ngjitet në vendin e tretë me 26 pikë, ndërsa Skënderbeu mban vendin e parë me 34 pikë.
