Ajo që po ndodh te Vllaznia në këtë fund sezoni, është me të vërtetë qesharake.
Humbja e titullit, irritoi së tepërmi tifozët, të cilët nuk u kursyen me kritika ndaj klubit. Megjithatë, për të shuar këtë zhurmë, drejtuesit nisën një strategji të çuditshme. Një ditë pas përfundimit të kampionatit, klubi njoftoi rinovimin me trajnerin Edi Martini dhe drejtorin sportiv, Vioresin Sinani.
Deri këtu gjithçka në rregull! Por tifozët shfaqën pakënaqësi të mëdha, duke ditur se rinovimi erdhi pas vetëm një fitoreje në tetë ndeshje.
Për të tentuar edhe njëherë të heshtë tifozët, klubi doli me disa postime, duke njoftuar rinovimin me disa nga lojtarët më të pëlqyer.
Këtu nis dhe gafa e klubit. Një vit më parë, Vllaznia njoftonte afrimin e Sherif Kallakut, me kontratë deri në vitin 2027. Së fundmi, klubi për t’i hedhur hi syve të tifozëve, ka njoftuar rinovimin me mesfushorin deri në vitin 2027.
Një absurditet nga klubi, që mashtron hapur tifozët, duke njoftuar rinovimin me një lojtar që kishte kontratë pikërisht deri në vitin 2027.
Përveç kësaj, në faqen e klubit ka nisur dhe fshirja e komenteve të tifozëve që kritikojnë. Një gjest i turpshëm ky nga klubi, që nuk do kritikë, por vetëm persona që t’iu servilosen.
