Sulmuesi Redon Xhixha pritet të mbyllë përfundimisht aventurën e tij me skuadrën e Tiranës, teksa në Maqedoninë e Veriut e bëjnë fakt të kryer kalimin e tij te Shkëndija e Tetovës.
Sipas raportimeve të fundit, lojtari ka gjetur akordin me klubin tetovar, duke u bërë gati të japë kontributin e tij në kompeticionet europiane për sezonin e ri.
Ky largim vjen si një tjetër goditje për kampin bardheblu, që pas përfundimit të edicionit po përballet me humbjen e dy figurave qendrore të skuadrës. Përveç kapitenit Xhixha, nga klubi kryeqytetas është larguar edhe trajneri Orges Shehi, pasi asnjëri prej tyre nuk arriti marrëveshjen me drejtuesit për rinovimin e kontratës.
Pavarësisht mbylljes së bashkëpunimit, si tekniku ashtu edhe sulmuesi patën një rol vendimtar gjatë pjesës së dytë të sezonit, duke ndihmuar Tiranën të realizonte objektivin minimal të mbijetesës në elitë.
