Një gjest i jashtëzakonshëm humanizmi po vjen nga qyteti i Vlorës në prag të sfidës mes Flamurtarit dhe Vllaznisë. Ndeshja, e cila do të nisë sot në orën 18:00, pritet të ketë një atmosferë të zjarrtë në shkallët e stadiumit.
Mësohet se Presidenti i Flamurtarit, Sinan Idrizi, ka vendosur të shtrojë iftar për të dyja tifozëritë, pasi orari i ndeshjes përkon me kohën e iftarit.
Sipas “Shkodra Sport”, klubi vlonjat ka kontaktuar zyrtarët e Vllaznisë për të marrë informacion mbi numrin e saktë të tifozëve shkodranë që agjërojnë, me qëllim që t’u dërgohet ushqim direkt në stadium.
Ky veprim fisnik kapërcen rivalitetin sportiv në fushë dhe tregon vlerat e larta të mikpritjes shqiptare, duke u kthyer në një model për t’u ndjekur në të gjitha stadiumet tona.
