Situata te Kombëtarja shqiptare, nuk është më e mira e mundshme në prag të duelit me Poloninë.
Trajneri Silvinjo ndodhet përballë një situate alarmante në repartin e sulmit, pasi kur mbeten vetëm dy javë nga grumbullimi, ka humbur dy shtyllat kryesore të ofensivës.
Pas Armando Brojës, i cili mbetet ende i dëmtuar dhe jashtë stërvitjes, lajmet negative vijnë nga Rusia për Mirlind Dakun.
Trajneri i ri i Rubin Kazan, Frank Artiga, ka konfirmuar se sulmuesi kuqezi vuan nga një dëmtim specifik në tendinë dhe situata është më e rëndë nga sa parashikohej.
Artiga theksoi se Daku nuk do të rikthehet në fushë pa qenë 100% i rikuperuar, pasi një rikthim i parakohshëm mund të shkaktonte një dëmtim katastrofik që do ta mbante lojtarin jashtë për një kohë shumë të gjatë.
Ky bllokim i “bomberave” e detyron Silvinjon të kërkojë alternativa të reja në një kohë kur pesha e fanellës dhe rëndësia e objektivit kërkojnë lojtarë në formë maksimale. Pa Dakun dhe Brojën, stafi teknik duhet të bëjë zgjedhje emergjente për të garantuar golin në rrugën drejt ëndrrës botërore.
