Anis Mehmeti nuk ka humbur kohë për të treguar vlerat e tij te Ipswich Town, duke gjetur golin e parë me fanellën e re vetëm pak javë pas transferimit gjatë merkatos së janarit.
Futbollisti i Kombëtares shqiptare, i cili u rreshtua si titullar në transfertën e vështirë ndaj Wrexham, shënoi golin e barazimit në minutën e 20-të të takimit.
Mehmeti u tregua i vëmendshëm në zonë, duke u pozicionuar saktë për të dërguar topin në rrjetë dhe për të rikthyer baraspeshën.
Ky gol mbart një peshë të veçantë për “Traktoristët”, pasi u realizua kundër një rivali direkt në garën për zonën play-off të Championship. Wrexham, klubi në pronësi të yjeve të Hollivudit, Ryan Reynolds dhe Rob McElhenney, është një nga skuadrat më me pretendime për t’u ngjitur në Premier League këtë sezon.
Për Mehmetin, ky ishte goli i 9-të sezonal në kampionat, pasi 8 të tjerë i shënoi me Bristol City në pjesën e parë të edicionit, duke konfirmuar formën e tij të shkëlqyer që po e ndjek edhe në aventurën e re.
