Sulmuesi i Kombëtares shqiptare, Rei Manaj, është përfshirë në një aksident automobilistik në qytetin e Sivasit në Turqi.
Sipas raportimeve të para nga mediat vendase, ngjarja ka ndodhur në rrugën “Bagdat”, teksa futbollisti po kthehej në shtëpi.
Fatmirësisht, Manaj nuk ka pësuar lëndime fizike dhe ndodhet në gjendje të mirë shëndetësore, duke regjistruar vetëm dëme materiale në mjetin e tij.
Deri në këto momente, klubi i Sivasspor nuk ka dalë me një njoftim zyrtar për të zbardhur detajet e plota të ngjarjes, por burimet pranë lojtarit konfirmojnë se gjithçka ka kaluar pa pasoja serioze.
