Fitorja ndaj Dinamos ka kthyer qetësinë dhe optimizmin te Flamurtari, duke u shoqëruar me një bonus të majmë financiar për futbollistët vlonjatë.
Drejtuesit e klubit kanë shpërndarë një premio prej rreth 50 milionë lekësh si shpërblim për triumfin e fundit, një lëvizje kjo që synon të mbajë lart moralin e ekipit në këtë fazë delikate.
Ky shpërblim vjen pas atij të dhënë për fitoren ndaj Egnatias, ndërsa shpërndarja e parave është bërë nga djali i presidentit, Ensar Idrizi, i cili po qëndron gjithnjë e më afër skuadrës.
Presidenca e Sinan Idrizit duket se ka hartuar një strategji të qartë motivimi, ku çdo sukses i radhës do të ketë një premio të dedikuar, përfshirë këtu edhe sfidën e ardhshme kundër Partizanit.
Megjithatë, “qershia mbi tortë” është rezervuar për mbylljen e kampionatit. Nëse kuqezinjtë arrijnë të sigurojnë mbijetesën në elitë, lojtarët do të përfitojnë një superpremio prej 200 milionë lekësh.
Kjo shumë marramendëse tregon qartë vendosmërinë e klubit për të mos u dorëzuar dhe për të motivuar maksimalisht grupin drejt arritjes së objektivit sezonal.
