Humbja në derbi ndaj Tiranës ka krijuar një situatë alarmante te Partizani, duke vënë në rrezik serioz pjesëmarrjen në “Final Four” dhe kualifikimin në Europë.
Ky dështim i mundshëm pritet të sjellë pasoja drastike, ashtu siç pati paralajmëruar presidenti Gazment Demi dy muaj më parë. Kreu i klubit ishte i prerë në deklaratat e tij, duke theksuar se mosarritja e Europës do të thoshte dështim total për trajnerin Kërnaja dhe drejtorin sportiv Ibraimi.
Me një koeficient rekord prej 7.5 në Europë, Partizani e konsideron pjesëmarrjen ndërkombëtare si jetike për mbijetesën financiare dhe sportive. Demi deklaroi se u ka plotësuar çdo dëshirë drejtuesve teknikë, por llogaria përfundimtare do të bëhet në qershor.
Ashtu siç u shpreh presidenti, nëse objektivi minimal dështon, “të dy janë të dështuar”, duke lënë të kuptohet se askush nuk e ka vendin e sigurt në klub.
“Mos flasim më shumë, themi të shpresojmë që ne të shkojmë në katërshe dhe të luftojmë për Kupën. Partizani po nuk doli në Europë këtë vit është i mbaruar, jemi me koeficientin më të madh ne Europë, 7.5.
Unë si president ia kam plotësuar çdo dëshirë si trajnerit, si drejtorit sportiv, i kam thënë do flasim në qershor bashkë. Para disa minutash më mori në telefon drejtori sportiv dhe më kërkoi diçka, i thashë mos më thuaj mua fare, ti vendos dhe unë e bëj. Në qoftë se nuk dalim në Europë, të dy janë të dështuar”, ishin fjalët e thëna për RTSH vetëm dy muaj më parë të Demit.
