Kategoria e Dytë ka hyrë në fazën e saj më nxehtë, ku dy sfida deçizive janë planifikuar të luhen këtë të diel, më 3 maj, në orën 15:00. Sopoti do të masë forcat me Shirokën në stadiumin “Selman Stërmasi” për Grupin A, ndërsa Butrinti do të luajë ndaj Bylisit B në “Luz i Vogël” për Grupin B.
Këto takime do të jenë me eliminim direkt dhe, në rast barazimi, fituesi do të përcaktohet përmes goditjeve të penalltive. Sipas rregullores së FSHF-së, nuk do të ketë short, pasi çiftet finale janë të paracaktura në bazë të pozicionimit në grupe.
Rregullorja krijon një skenar interesant për fazën tjetër, ku fituesit e këtyre sfidave do të tentojnë ngjitjen përmes ndeshjeve “play-off” me ekipet e Kategorisë së Parë. Fituesi i Grupit B (Butrinti ose Bylisi B) ka një avantazh teorik pasi do të përballet me vendin e 10-të të Kategorisë së Parë, pozicion që aktualisht mbahet nga Kukësi.
Ndërkohë, fituesi i çiftit Sopoti-Shiroka do të ketë një mision më të vështirë, pasi do të ndeshet me vendin e 9-të, ku për momentin renditet Luftëtari. Gjithçka mbetet e hapur, teksa java e fundit në Kategorinë e Parë do të vulosë përfundimisht emrat e skuadrave që do të luftojnë për mbijetesë.
