Komisioni i Disiplinës dhe Etikës në FSHF ka publikuar vendimet pas sfidave të fundit të Kupës së Shqipërisë, duke gjobitur financiarisht Elbasanin dhe Vllazninë.
Të dyja klubet janë ndëshkuar me nga 100.000 lekë gjobë për sjelljen e spektatorëve, të cilët kanë hedhur sende në fushë dhe kanë përdorur kore fyese ndaj kundërshtarëve.
Pas sfidës ndaj Dinamos, ku trajneri Edi Martini dhe zyrtarët e tjerë nuk u kthyen në intervistat pas ndeshjes, Disiplina ka lëshuar një paralajmërim zyrtar.
Edhe pse për raste të ngjashme më parë si ndaj Vorës nuk pati masa, këtë herë klubi shkodran është njoftuar se çdo përsëritje e thyerjes së rregullores mediatike do të pasojë me sanksione të rënda disiplinore.
VENDIMET:
-AF Elbasani, për sjellje të gabuar të spektatorëve, duke hedhur sende në fushën e lojës duke rrezikuar sigurisë e zyrtarëve dhe lojtarëve të ekipit kundërshtar, në bazë të neneve 17/2/b dhe 17/2/h të KDE, dënohet me gjobë në masën 100.000 (njëqind mijë) lekë.
-KF Vllaznia, për sjellje të gabuar të spektatorëve, duke hedhur sende në fushën e lojës dhe duke përdorur kore fyese në drejtim të lojtarëve të ekipit kundërshtar, në bazë të neneve 17/2/b dhe 17/2/e të KDE, dënohet me gjobë në masën 100.000 (njëqind mijë) lekë.
-Për mosrespektimin e detyrimit për daljen e zyrtarëve në intervistën pas ndeshjes, në kundërshtim me nenin 77 të Rregullores së Aktivitetit, në bazë të nenit 6/1/a të KDE, Klubi i Futbollit Vllaznia paralajmërohet se në rast përsëritjeje të kësaj shkeljeje apo të çdo shkeljeje tjetër të ngjashme të detyrimeve mediatike, do të jetë subjekt i masave disiplinore të parashikuara nga Kodi i Disiplinës dhe Etikës si dhe Rregulloret e FSHF.
-Kundër vendimit lejohet ankim brenda 3 (tre) ditëve përpara Komisionit të Apelit.
