Stadiumi i kryeqytetit, “Selman Stërmasi”, po bëhet gati për një transformim rrënjësor. Qeveria shqiptare ka miratuar së fundmi një shtesë në Vendimin e Këshillit të Ministrave (VKM), duke i hapur rrugën projektit të investimit për rijetëzimin e tij përmes Korporatës së Investimeve Shqiptare.
Sipas vendimit të fundit (datë 30.3.2026), procesi do të kryhet përmes instrumentit ligjor të sipërmarrjes, duke e pozicionuar Korporatën si zhvilluesin kryesor të projektit.
Ndonëse detajet teknike dhe arkitekturore të ndërhyrjeve nuk janë bërë ende publike, ky hap ligjor konfirmon kalimin e pronës shtetërore në funksion të një investimi madhor që synon të kthejë stadiumin në një qendër moderne sportive dhe ekonomike.
Ky projekt pason transferimin e pronës te AIC të vendosur në fund të vitit 2024, duke shënuar një fazë të re për impiantin që prej kohësh ka qenë jashtë standardeve për ndeshje ndërkombëtare.
“Në mbështetje të nenit 100 të Kushtetutës, të pikës 1, të nenit 7, të ligjit nr.71/2019, “Për Korporatën e Investimeve Shqiptare”, dhe në zbatim të shkronjës “b”, të pikës 1, të kreut II, të vendimit nr.137, datë 6.3.2024, të Këshillit të Ministrave, “Për përcaktimin e kritereve dhe të procedurës për dhënien e pronës shtetërore me qira, enfiteozë, leasing, shitje, përdorim si kolateral dhe të përdorimit në forma të tjera nga ana e Korporatës së Investimeve Shqiptare”, të ndryshuar, me propozimin e ministrit të Ekonomisë dhe Inovacionit, Këshilli i Ministrave
V E N D O S I:
1. Në vendimin nr.769, datë 13.12.2024, të Këshillit të Ministrave, “Për transferimin te Korporata e Investimeve Shqiptare të pronave shtetërore për realizimin e projektit të investimit “Rijetëzimi i stadiumit ‘Selman Stërmasi’, Tiranë””, bëhen këto shtesa dhe ndryshime:
a) Në pikën 2 bëhen shtesa dhe ndryshimi i mëposhtëm:
i. Pas fjalëve “… për të vepruar si zhvillues …” shtohen “… nëpërmjet instrumentit ligjor të sipërmarrjes …”;
ii. Fjalët “… vendimeve nr.95, datë 9.9.2024 dhe nr.112, datë 8.10.2024 …” zëvendësohen me “… vendimeve nr.95, datë 9.9.2024, nr.112, datë 8.10.2024 dhe nr.36, datë 30.3.2026 …” thuhet në VKM e miratuar së fundmi.
