Trajneri Ilir Daja është kandidati kryesor për të marrë drejtimin e Skënderbeut për sezonin e ardhshëm futbollistik.
Sipas raportimeve nga “Korca Boom”, bëhet me dije se palët janë shumë pranë arritjes së një marrëveshjeje për rikthimin e teknikut në stol. Aktualisht, Daja është nën kontratë me Dinamo City, skuadër me të cilën po merr pjesë në fazën “Final Four” të kampionatit.
Megjithatë, raportohet se marrëdhëniet mes tij dhe drejtuesve të klubit kryeqytetas janë krisur së fundmi. Për këtë arsye, zyrtarizimi i lëvizjes pritet të bëhet menjëherë pas përfundimit të ndeshjeve finale të Superiores.
Drejtuesit e Skënderbeut synojnë që përmes këtij emërimi të nisin një projekt ambicioz për rikthimin e klubit në nivelet më të larta. Objektivi kryesor i skuadrës në edicionin e ri pritet të jetë shpallja kampion.
Rikthimi i mundshëm i teknikut ka zgjuar interes të madh edhe në radhët e tifozërisë korçare. Palët do të ulen në bisedime për të saktësuar detajet e kontratës së re pas mbylljes zyrtare të këtij sezoni.
