Kylian Mbappé po kalon një nga momentet më të vështira që prej transferimit të tij te Real Madridi. Sulmuesi francez u rikthye në fushë në ndeshjen që skuadra madrilene fitoi me rezultatin 2-0 ndaj Real Oviedos, por atmosfera në Santiago Bernabéu nuk ishte ajo që pritej. Gjatë sfidës, një pjesë e tifozëve reaguan me fishkëllima, duke treguar qartë pakënaqësinë e tyre ndaj yllit francez.
Pakënaqësia e mbështetësve lidhet me periudhën e fundit të mungesës së Mbappé dhe raportimet në media për pushimet e tij në Sardenjë gjatë kohës që ishte jashtë fushave për shkak të një dëmtimi fizik. Pas përfundimit të ndeshjes, vetë lojtari vendosi të flasë publikisht për situatën dhe deklaratat e tij kanë shtuar menjëherë tensionin në ambientin e klubit.
Mbappé bëri të ditur se ishte në gjendje të luante si titullar, por sipas tij, trajneri Álvaro Arbeloa i kishte komunikuar se aktualisht konsiderohej zgjedhja e katërt në sulm, pas Franco Mastantuonos, Vinícius Júnior dhe Gonzalo García. Francezi u shpreh se e respekton vendimin e teknikut, por theksoi se fizikisht ishte plotësisht gati për të nisur ndeshjen nga minuta e parë. Ai reagoi edhe ndaj kritikave për udhëtimin në Sardenjë, duke sqaruar se kishte marrë leje zyrtare nga klubi për atë pushim.
Pas këtyre deklaratave erdhi menjëherë kundërpërgjigjja e ashpër e trajnerit Arbeloa. Tekniku i përkohshëm i Real Madridit mohoi kategorikisht që t’i ketë thënë Mbappé-s se ishte zgjedhja e katërt në repartin ofensiv, duke sugjeruar se lojtari mund të ketë keqkuptuar bisedën mes tyre. Arbeloa shpjegoi se kishte diskutuar me francezin para ndeshjes dhe kishte vendosur që ai të mos niste si titullar thjesht për arsye fizike.
Trajneri theksoi se një lojtar që nuk ishte gati të aktivizohej as nga stoli katër ditë më parë, nuk mund të konsiderohej automatikisht gati për të luajtur 90 minuta. Ai shtoi gjithashtu se vendimet për formacionin do të vazhdojnë të merren vetëm nga ai, pa u ndikuar nga emrat apo statusi i lojtarëve në skuadër.
Ndërkohë, situata pritet të marrë një tjetër dimension akoma më serioz. Sipas raportimeve të fundit nga mediat spanjolle, Real Madridi po shqyrton mundësinë e një mase disiplinore ndaj sulmuesit. Në rast se deklaratat e tij konsiderohen të dëmshme për imazhin e klubit, Mbappé mund të përballet me një gjobë që mund të arrijë deri në 100 mijë euro, bazuar në rregulloren e përbashkët mes La Liga-s dhe sindikatës së futbollistëve (AFE).
Kjo situatë shton më shumë kaos në një periudhë delikate për Real Madridin, ku priten ndryshime të mëdha në pankinë, me Arbeloan që pritet t’i lirojë vendin trajnerit të ri në fund të sezonit.
